ЗЕЛС: Општините ќе се блокираат, итно да се реши што со мандатите

Заедницата на единиците на локалната самоуправа бара најкасно до петок да се донесе решение околу мандатите на градоначалниците кои законски истекуваат на 15-ти мај. Во спротивно, велат од ЗЕЛС, општините нема да може нормално да функционираат.

„Нашиот страв е дека ќе настанат последици по нормалното функционирање на локалната самоуправа, односно истата нема да може да ги извршува своите функции со оглед дека нити Советот ќе носи одлуки, нити градоначалникот ќе има право истите да ги спроведува или да одлучува за права и обврски кои му се утврдени како надлежност со посебни Закони“, се вели во нивниот став.

Од таму наведуваат неколку клучни надлежности кои ќе се блокираат: платите на административците, на вработените во јавните претпријатија и на вработените во училиштата, потоа издавањето на градежни дозволи, па дури и склучувањето на бракови, со оглед на тоа што официјални сведоци треба да бидат претставници на општинските совети.

Претпладнево, Уставниот суд донесе одлука да не поведува постапка по иницијативата за разгледување на одредени членови од Изборниот законик кои се однесуваат на мандатите на градоначалниците и советите. Сега, одлуката останува во рацете на Собранието. Најавено е дека ЗЕЛС и Министерството за локална самоуправа ќе побараат од претседателот Таљат Џафери да свика седница на која ќе се разгледува прашањето.