Зголемен бројот на првачиња во општина Маврово и Ростуше

Во училиштата на подрачјето на општина Маврово и Ростуше, новата учебна година започна за над 680 основци и средношколци. Годинава, се бележи пораст на бројот на првачиња. Запишани се 52, што е за десетина повеќе од лани.

„Надежта на нашата Општина е во младите и образовани кадри кои треба нашиот регион да го направат попросперитетно место со многу подобри услови за живеење. На сите вработени во училиштата им посакувам успешна работа, а на сите ученици пред се` здравје, успех и добри резултати во натамошното образование“, изјави градоначалникот Медат Куртовски, кој ги посети училиштата на првиот ден од новата учебна година.

Од општина Маврово и Ростуше информираа дека претходно биле извршени сите подготовки за непречено одвивање на наставата и подигнување на нивото на хигиена со темелна дезинфекција на просториите во училишните објекти.

Во Средното општинско училиште во Ростуше оваа година настава ќе следат 136 ученици, од кои 50 во прва година, додека во основните училишта има околу 550 ученици.