Зголемен интензитетот на сообраќај надвор од градовите

Летните одмори придонесуваат за создавање гужви низ патиштата и редици возила на граничните премини, особено нагласено за време на викендите. И овој викенд не е исклучок, уште повеќе што многу граѓани решија да го поврзат празничниот неработен ден, вторник, и да заминат на продолжен викенд.

Автомото Сојузот на Македонија соопшти дека интензитетот на сообраќај на патните правци надвор од градските средини е зголемен. На ГП Табановце времето на чекање за влез во државата е околу еден час, на ГП Богородица за излез се чека исто така околу еден час, а на ГП Дојран за излез се чека околу 45 минути. На останатите гранични премини, од македонска страна, нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.