Зголемен ризик од пожари на отворено, апел за максимална внимателност

Зголемувањето на температурите во голема мерка го кренаа нивото на потенцијалните опасности за избувнување пожари на отворено, предупредуваат надлежните.

Секторот за внатрешни работи Тетово испрати апел до граѓаните да бидат постојано внимателни ако се движат или работат во полето и низ шумите, да не ги палат отпадоците, меѓите и стрништата на нивите и да не фрлаат неизгаснати догорчиња и опушоци.

„Покрај ова, на оние кои престојуваат на излетничките места во регионот, им се укажува да се воздржат од  палење огнови, кои неизгаснати брзо можат да пламнат и да се прошират наоколу, а со тоа да предизвикаат и  материјални и други последици од големи размери. Им се советува, исто така, на отворен простор да не оставаат стаклени шишиња или други лесно запаливи предмети, кои подолго време изложени на сонце, можат да причинат пожар’, се вели во апелот.

Институциите потсетуваат дека за предвизвикување пожар, затворските казни се движат од 6 месеци до 8 години, зависно од видот на пожарот и другите околности и последици.

Од Секторот за внатрешни работи Тетово соопштија дека веќе преземаат координирани превентивни и други мерки, навреме да се пресретнат можните причини за пожари, а ќе бидат засилени и планираните контролни активности на поширокото подрачје, кои овој и наредните месеци заеднички ќе се реализираат со други надлежни институции на подрачјето.