Зголемен водостојот на реките во западниот дел, одрони на патот Кичево-Охрид

Од УХМР известуваат дека како резултат на врнежите изминатата ноќ, поголеми зголемувања на водостојот има на водотеците во западниот дел на земјата, односно на реките Радика, Сатеска, Голема и Пена, кои и денеска се очекува да бидат високи, особено на Радика заедно со нејзините притоки во сливот. Поради најавените можни локални поројни врнежи во источните делови, можно е на места зголемување на водостојот на помалите реки и суводолици во тој регион.

Центарот за управување со кризи предупреди на внимателно движење покрај реките и суводолиците во крајните западни и во делови од источните делови (каде се најавени можни локални поројни врнежи) на земјата во текот на денешниот ден.

На магистралниот пат Кичево – Охрид, кај село Врбјани од 12:30 часот сообраќајот на една коловозна лента е блокиран. Како што соопшти АМСМ, причина за тоа се одрони на пат.