Зголемете ги визуелно малите простории со помош на огледала

Многумина од нас се борат со недостиг на простор во становите или куќите. Не очајувајте, постојат трикови со чија помош може визуелно да го зголемите просторот, а еден од нив се и огледалата. Внимателно избраните места за огледала може просторијата да ја направат по распространета.

Ако огледаото го поставите близу прозорецот, ќе погодите две муви со еден замав. Природната светлина директно ќе се рефлектира во просторијата и ќе ја осветли и визуелно зголеми. Дури може и светлината да ја насочите кон потемните делови на просторијата.

Огледалата никако немојте да ги поставувате наспроти прозорците кои гледаат на југ или запад, за да ја избегнете непријатната рефлексија.

Доколку имате тесен ходник, огледалото поставете го хоризонтално на една цела страна. Воедно, ѕидовите на ходникот или собата нека бидат со светла боја, ако имате или сакате дополнителни елементи, претсобје, плакар и слично, поставете го огледалото на нив.

Ако огледалото го поставите помеѓу два прозорци, ќе добиете на длабочина на просторијата, а истото може да го постигнете ако еден ѕид го префарбате со темна боја и на него поставите огледало.

Постои и трик со огледало на таванот, дизајенрите тврдат дека така собата визуелно ќе биде повисока и пораскошна.