Зградата на гимназијата во Гостивар ќе се реновира

Зградата на гостиварската гимназија ќе се поднови со енергетски ефикасни прозорци. Проектот заеднички ќе го реализираат Општина Гостивар и УСАИД. За таа цел денес беше потпишан Меморандум за соработка, по што ќе следуваат тендерските процедури, па почеток на работите.

„Општина Гостивар конкурираше со овој проект, и ќе го реализираме, дел со средства од буџетот и дел од УСАИД. Се работи за менување на прозорите во гимназијата. Ова не е прв проект што УСАИД го поддржува во Гостивар. Сакам да им се заблагодарам за оваа коректна и добра соработка што ја имаме.“, рече градоначалникот Арбен Таравари.

Задоволство од партнерството изразија и претставниците на УСАИД.

„Традиционално ја продолжуваме соработката која ја имаме долги години, на највисоко ниво. Не само од аспект на реновирање на училиштето, туку и во сите други активности сме многу задоволни, како на пример во оние за меѓуетничка интеграција на младите. Овој пат заедно со општината на партнерско ниво, дури општината ќе инвестира повеќе, ќе продонесеме условите за учење во гимназијата да бидат подобри и да покажеме  пример како се гради соживот, меѓуетничка интеграција и квалитетно образование.“, истакна Небојша Мојсоски од УСАИД.

Според најавите, изведувањето на работите треба да започне кон средината на април, при што ќе се работи во деновите од викендите за да не се попречува наставата, а се очекува проектот да се заврши за два до три месеци.