Зградата на Општина Гостивар ќе се реконструира и ќе биде енергетски ефикасен објект

Општинската зграда на Гостивар следната година ќе добие целосно нов лик и ќе стане енергетски ефикасен објект. Зафатот за реконструкција е дел од проектот за енергетска ефикасност во јавниот сектор, кој се реализира од проектната единица при Министерството за финансии, со финансиска поддршка од Светска Банка.

Предвидено е обнова на фасадата, замена на прозорците, како и наместо котелот на нафта, да се постави топлинска пумпа со сите дополнителни елементи кои ќе бидат потребни за затоплување и ладење на просториите.

„Со овој зафат ќе имаме енергетска ефикасност на зградата и подобри услови за работа на општинската администрација.“, рече Дашмир Османи од канцеларијата за локален економски развој на Општина Гостивар.

Денес во Гостивар се одржа презентација и јавна расправа за активностите и процедурите во склоп на проектот.

„Проектот претставува заем на РСМ од Светска Банка во вкупна вредност од 25 милиони евра и  има три компоненти. Гостивар е вклучен во компонентата за инвестиции во општините, која тежи вкупно 10,5 милиони евра. Општината аплицираше со проект за реконструкција на административната зграда, со вредност од околу 350.000 евра. Поволните услови се тоа што 80% од средствата се од заем, којшто ќе го враќа општината со доста поволна каматна стапка, а другите се грант од нашата програма.“, појасни Катарина Георгиевска, специјалист за животна средина во проектната единица на МФ.

Според најавите реконструкцијата на општинскиот објект ќе се заврши налето наредната година.