Живописот во црквата Св. Димитрија во Гостивар ќе се реставрира

Во текот на годинава ќе се реставрира живописот во храмот „Свети Димитрија“ на старите градски православни гробишта во Гостивар. Проектот за изведување конзерваторско-реставраторски работи на живописот е еден од проектите на гостиварскиот Конзерваторски центар за 2022-ра година кои добија финансиска поддршка од Министерството за култура и влегоа во Програмата за култура од национален интерес. За негова реализација ќе бидат издвоени половина милион денари. Храмот Св. Димитрија прв пат бил живописан во 1867 година од страна на познатиот Дичо Зограф, кој со својата тајфа работел во гостиварско. Во 1976 година фреско-живописот бил возобновен. Претходно, во истата црква, која датира од 1840 година, се спроведе реставрација на покривот и фасадата.

Министерството за годинава му одобри на Конзерваторски 6 проекти за заштита на културно-историското наследство, со вкупна вредност од 2,3 милиони денари. Најмногу пари се издвоени за третата фаза од реконструкцијата на старата џамија во Равен, милион и половина денари.

За евиденција на камена пластика на сакралните и профани објекти одобрени се 100.000 денари, за одржување на објекти од културното наследство 50.000, и по 80.000 денари за валоризација на објекти во Вруток и за основен проект за реставрација на Беговата куќа.