Зошто e важно децата да имаат хоби?

Детското хоби се рефлектира на однесувањето, размислувањето и стекнувањето на навики, па препорачливо е и вие како родители да се вклучите заедно со децата и да пронајдете некоја корисна активност.

Што децата навистина ги интересира?

Тешко е да се најде одговор на ова прашање. Децата, често делуваат како ни самите да не знаат што сакаат, а нивните родители знаат да се обесхрабрат поради нивната неодлучност. Меѓутоа, оваа појава е нормална кај децата кои се многу мали и тие треба да се остават да го пронајдат своето хоби. Недостатокот на искуство и запознавањето со светот, ги прави да бидат љубопитни, а ваше е на детето да му овозможите да проба се`.

Не мора под секоја цена активностите да вклучуваат фудбалски тренинзи, кошарка или часови по балет. Постојат многу други различни хобија, коишто можат да бидат од голем интерес за вашето дете. Доколку детето само се насочува кон нешто, дозволете му да ја изрази својата креативност. Од тоа еден ден може да излезе вистинско уметничко чудо.

Има деца кои уште од најрана возраст покажуваат интерес за некое хоби или поседуваат некој уметнички талент. Нив треба да ги поддржите со сета сила и да создадете услови во кои детето ќе може да учи и да напредува за да го усоврши талентот, којшто го поседува. Дури и ако неговата желба во некој момент се изгуби или пак пренасочи, прифатете ја таа промена како составен дел на растењето. На крајот на краевите, некогаш и сами не можете да одлучите што навистина сакате. Не го очекувајте тоа ни од детето.

Од кое хоби да почнете?

Не е потребно да го комплицирате детското хоби, ниту пак да трошите голема сума на пари за некоја спортска опрема, која ќе стои во некој ќош од вашиот дом, поради тоа што во меѓувреме вашето дете се заинтересирало за друго хоби. Нивната креативност и фантазија можете да ги поттикнете и во сопствениот двор или во кујната:

• Понудете му на вашето дете да ви прави друштво во кујна, кога подготвувате едноставни работи. Дајте му задача да го обликува тестото или да го декорира овошјето во некој сад. Нема сомнеж дека ќе настане голем неред, но замислете ја среќата на неговото лице кога ќе ги сервирате колачи, во чие правење и тоа имало удел.
• Девојчињата се природно склони кон тоа да чепкаат по орамарот на нивните мајки, па дури и да позајмат некоја нивна облека. Пронајдете марами, кои не ги користите, накит кој не сте го носеле одамна или некој интересен шешир. На ова додајте шноли, ластици за коса и друг прибор (аксесоари) и гледајте како настанува мал моден спектакал во вашиот гардаробер. Момчињата ќе бидат воодушевни доколку нивните татковици ги вклучат во поправка на велосипед или изработка на куќичка за птици.
• Се сеќавате на собирањето на салфетки, сликички, цртежи, значки…? Поставете им предизвик на вашите деца да направат мала колекција од овие или некои други работи. Ќе се почувствуваат одговорно, ќе вложат труд во таа задача и ќе имаат нешто свое. Најважно е тоа дека нивното време, ќе биде потрошено на продуктивен начин.
• Едно едноставно решение е и боењето. Доволно е да купите едно пакетче темперни бои и блок за цртање и забавата може да почне. Ќе се смеете со шаренилата исцртани на хартијата, за кои вашите деца ќе ви велат дека ве нацртале вас, заедно со нив. Најмногу ќе ве направи среќни, тоа што веродостојно ве нацртале. Доколку оваа инспирација прејде и на дел од вашиот ѕид, тогаш сетете се дека се е дел од новото хоби.

Постојат еден куп на интересни работи со кои можете да ги забавувате децата, и на ваше и на нивно задоволство. Што повеќе активности испробаат, така побрзо ќе ги изградат своите интересирања, ставови и чувството за одговорност. Ќе забележите и како ова се одразува на обавувањето на училишните обврски и целокупното нивно однесување, а заедно со нив и вие ќе уживате.