Зошто луѓето викаат? (поучна приказна)

Еден ден учителот ги прашал своите ученици:

„Зошто луѓето викаат кога се лути? ”

Учениците размислувале некое време. Еден ученик рекол:

„Викаме затоа што го губиме трпението ”.

„Но треба ли да се вика ако личноста на која ѝ викате е веднаш до вас? ” – прашал учителот. „Зарем не е можно да се разговара тивко и смирено? ”

Учениците продолжиле да даваат одговори, но ниту еден од нив не бил доволно добар за да го задоволи учителот, па затоа им го дал следното објаснување:

„Кога две личности се караат и се лутат, нивните срца се оддалечуваат. Затоа мораат да викаат еден на друг. Нивниот висок и груб глас ја намалува  оддалеченоста, за да можат поубаво да се слушнат. Колку што се полути, толку погласно мораат да викаат, бидејќи во тој случај оддалеченоста помеѓу нив е поголема. ”

Потоа учителот повторно ги прашал учениците:

„Што се случува кога две личности ќе се засакаат? Не викаат еден на друг, туку си зборуваат меѓу себе тивко и нежно. Зошто? Нивните срца се многу блиску. Оддалеченоста помеѓу нив е многу мала.
А што се случува со нив кога уште повеќе ќе се засакаат? Не зборуваат. Само шепотат и сé повеќе се зближуваат со нивната љубов. На крај не треба повеќе ниту да шепотат. Само се гледаат и тоа е сè. Така се однесуваат две личности кои се сакаат. ”

На крајот учителот им рекол:

„Кога се карате, не им дозволувајте на вашите срца да се оддалечат, не изговарајте зборови кои би можеле уште повеќе да ве оддалечат, бидејќи ќе дојде ден кога оддалеченоста ќе биде премногу голема, па ќе немате шанса да се вратите назад во минатото и да поправите некои грешки. ”