Зошто се верува дека детелината со 4 листа носи среќа?

Нема човек кој барем еднаш во детството шетајќи во природа, не се пуштил во потрага по детелина со четири листа. Верувањето дека токму четирилисната детелина е таа која носи среќа, датира од многу одамна и како такво се пренесува на генерациите.

Детелината со четири листа е резултат на генетска мутација која се јавува кај некои врсти на оваа билка. Сепак, точната причина зошто и под кои услови настанува, се уште не е утврдена. Како и да е, луѓето веруваат дека ќе ги следи среќа и ќе им се случуваат убави нешта во животот, доколку во поле полно со „обични“ детелинки ќе успеат да ја пронајдат таа ретката, со 4 листа.

Од каде и од кога потекнува ова верување?

Според една од легендите, распространета кај Германците, четирилисната детелинка се користела за отстранување на лоши магии, имала моќ и енергија да привлекува светли сили и да го расчистува злото.

Друга легенда е врзана со христијанската вера и кажува дека Ева (првата жена според Библијата) со себе носела детелина со четири листа кога го напуштила рајот.

Некои древни народи ја користеле четирилисната детелина за ориентација, сметајќи дека едната линија ги покажува страните каде Сонцето изгрева и заоѓа, а другата правците, север и југ. Затоа што им ги покажувала страните на светот, ја сметале за среќна.

Според едно старо верување кое со генерации и генерации е пренесувано, секој од четирите листа има свое посебно значење и тие ги симболизираат Вербата, Надежта, Љубовта и Среќата.