Зошто симптомите на настинка се влошуваат навечер?

Просечниот возрасен човек настинува 2-3 пати годишно, а секоја настинка може да трае околу една недела. Симптомите на настинка, како што се течење на носот и кашлицата, обично се благи. Но, зошто истите овие симптоми одеднаш стануваат неподносливи кога се обидувате да спиете?

Вашиот деноноќен ритам може да влијае на симптомите

Деноноќниот ритам е вашиот внатрешен биолошки часовник кој работи 24 часа. Регулира бројни телесни функции, вклучувајќи го и циклусот сон-будење.

Иако вашиот имунолошки систем е веќе активен за време на болеста, вклучително и настинка, вашиот деноноќен ритам може дополнително да ја зајакне неговата активност во текот на ноќта.

Нивото на кортизол се намалува

Кортизолот е хормон кој телото го произведува како одговор на стресот, но помага и во регулирањето на функцијата на имунолошкиот систем и воспалението.

Нивото на кортизол природно се зголемува наутро, што помага во намалување на воспалението и симптомите на настинка. Сепак, нивото на кортизол опаѓа ноќе, што може да предизвика влошување на симптомите.

Хоризонтална положба

Луѓето го поминуваат поголемиот дел од денот седејќи или стоејќи, што го олеснува испуштањето на слузта од задниот дел на грлото. Кога ќе легнете, оваа дренажа станува потешка, што може да го отежне заспивањето и да го наруши сонот.

Поголема свест за симптомите

Во текот на денот луѓето често се преокупирани со работа и други обврски, па помалку се свесни за нивните симптоми. Но, кога одите на спиење, обично има помалку одвлекување на вниманието. Ова ве тера да се фокусирате повеќе на симптомите и забележувате колку лошо се чувствувате, што може дополнително да го влоши впечатокот.

Совети за ублажување на симптомите на настинка во текот на ноќта

Лекарите препорачуваат неколку чекори кои ќе ви помогнат да се чувствувате подобро додека се борите со настинка:

Спијте на повисока пеница – ова помага да се спречи акумулацијата на слуз во задниот дел на грлото, што може да ги влоши симптомите.

Користете овлажнувач на воздух– може да спречи сушење на носните пасуси во текот на ноќта. Важно е уредот да се чисти редовно според упатствата на производителот за да се избегне таложење на мувла и бактерии.

Останете хидрирани – дехидрацијата може да ја направи слузта погуста и потешка за отстранување па затоа, важно е да пиете доволно вода додека сте болни.

Туширајте се со топла пареа – Ако не се чувствувате добро и не можете да спиете, тушот со пареа може да помогне да се олабави слузта и да се исчистат вашите дишни патишта.

Ако имате проблеми со спиењето поради настинка или забележите дека вашата состојба се влошува откако веќе сте почнале да се чувствувате подобро, разговарајте со вашиот лекар.