Идеи за зимница по рецепт на Италијанците

Ако годинава во зимница сакате и нешто поинакво од традиционалниот ајвар, лутенца, туршија, може да пробате италијански идеи: сушени домати во масло и „градина во тегла“. Еве како се подготвуваат:

Црвени домати се сечат на половина или четвртини, се посолуваат и се сушат на сонце или во рерна на ниска температура, додека не ја изгубат поголемата количина вода, но да останат еластични. Потоа се редат во чисти тегли, а меѓу нив се додаваат лук, оригано или мајчина душица и по желба, малку лута пиперка. На крај се прелеваат со маслиново масло така што доматите целосно да бидат покриени. Теглите се стерилизираат.

Во зима може да се користат со сирење и леб, во салати, тестенини, на пица или како додаток на месо.

Наместо еден зеленчук, Италијанците имаат зимница во која се мешаат повеќе вкусови. Се вика „градина во тегла“, а името одлично ја опишува шарената содржина на теглата.

Најчесто се користат моркови, карфиол, пиперки, целер и кромид. Зеленчукот се сече на парчиња, а маринадата се прави од вода, оцет, маслиново масло и сол. Потоа зелечнукот се реди во чисти тегли и се прелева со маринадата. По желба се додаваат ловоров лист и зрна црн бибер. Теглите се стерилизираат.

„Градина во тегла“ се служи како предјадење или прилог, со сирење, сувомеснати производи, леб, но може да се додаде и во сендвичи и салати.