Во Бигорски почнува одбележувањето на главната манастирска слава

Во Бигорскиот манастир денес (четврток) попладне почнува одбележувањето на главната манастирска слава, посветена на Отсекувањето на главата на Свети Јован Крстител.

Централниот дел од празничната програма ќе се одржи во четврток и петок, 10 и 11 септември, а годинашното одбележување ќе биде одбележано и со замонашување на тројца нови членови на Бигорската обител, како и со гостување на византискиот хор „Свети Јован Кукузел“ од Тирана.

Програмата денес започнува во 16 часот со Мала вечерна богослужба, по што во 18:30 часот ќе се одржи Повечерие. Во 19 часот е најавен свечениот пречек на архиереите и почетокот на празничното сеноќно бдение. Во 20 часот ќе се одржи чин на замонашување на тројца нови браќа на Бигорската обител, по што ќе продолжи празничното бдение. Во 22 часот е закажана празнична Утрена богослужба, а на полноќ Првиот час.

Празничните богослужби ќе бидат придружени со пеењето на хорот при Бигорското братство и византискиот хор „Свети Јован Кукузел“ од Тирана. Хорот ќе учествува на прославата со благослов на Архиепископот на Тирана, Драч и на цела Албанија, Јован.

Одбележувањето продолжува во петок, 11 септември, на денот на манастирската слава. Во 8 часот ќе се одржат Третиот и Шестиот час, во 8:30 часот е свечениот пречек на архиереите, а во 8:45 часот ќе започне светата архиерејска Златоустова Литургија. Програмата завршува во 16 часот со Ктиторска вечерна богослужба.

Од Бигорскиот манастир ги повикуваат верниците и посетителите да присуствуваат на празничните богослужби и на одбележувањето на манастирската слава.