Летото ги враќа читачките навики, ништо поубаво од добра книга!

Налето за среќа деновите се подолги, посветли, а попладнињата како да се создадени за сенка, ладен пијалак и добра книга. Затоа не е случајно што токму во овој период многумина повторно стануваат читатели. Некој конечно ја отвора книгата што со месеци собирала прашина на наткасната. Некој си поставува предизвик да прочита барем една книга додека е на одмор. А има и такви што без книга во торбата не тргнуваат никаде, било да се на плажа, покрај езеро или на планина.

И додека околу нас постојано светкаат екрани, можеби токму летото е вистинскиот момент да си подариме малку тишина со книга.

Телефонот секогаш има уште едно видео, уште една фотографија, уште една вест, уште едно известување. Половина час подоцна, тешко се сеќаваме што сме гледале. Книгата функционира сосема поинаку. Таа не брза, не прекинува, не бара лајк. Само ве повикува да влезете во нејзиниот свет.

Психолозите одамна укажуваат дека читањето ја подобрува концентрацијата, ја стимулира меморијата и помага во намалување на стресот. Особено навечер, кога наместо синиот сјај од телефонот, очите ги следат редовите на хартијата. Тоа е мал ритуал што му годи и на умот и на телото.

Ако не знаете од каде да почнете, еве неколку наслови кои не се „лесни летни романси“, туку книги што остануваат со читателот и долго по последната страница.

„Сто години самотија“ – Габриел Гарсија Маркес

Класика која еднаш во животот мора да се прочита. Магичниот реализам, семејната сага и светот на Макондо се вистинско книжевно патување.

„Човекот по име Уве“ – Фредрик Бакман

Топла, духовита и длабоко човечка приказна што потсетува дека зад секоја намуртена надворешност се крие приказна која вреди да се слушне.

„Книга на немирот“ – Фернандо Песоа

Не е книга што се чита наеднаш, туку полек, по неколку страници. Совршена за утринско кафе или тивка летна вечер.

„Шантарам“ – Грегори Дејвид Робертс

Роман инспириран од вистински настани. Бегалец од австралиски затвор започнува нов живот во Бомбај. Комбинација од авантура, криминал, филозофија, љубов и патувања.