Зошто рутерот треба повремено да се исклучи од струја

Домашниот Wi-Fi рутер работи без прекин, ден и ноќ, и често забораваме колку важна улога има. Преку него на интернет се поврзани телефони, компјутери, телевизори, камери и други паметни уреди.

Токму затоа американската Агенција за национална безбедност (NSA) препорачува рутерот периодично да се рестартира. Со исклучувањето од струја се брише содржината на оперативната меморија, што може да прекине одредени злонамерни процеси што моментално работат на уредот.

Но, тука има една важна работа: рестартирањето не значи дека рутерот е „исчистен“ од хакери. Ако постои безбедносен пропуст, напаѓачот може повторно да влезе.

Затоа, покрај повремениот рестарт, проверете дали рутерот има најнов фирмвер, користете силна лозинка и исклучете ги функциите што не ги користите, особено далечинскиот пристап.

Ако рутерот е стар и производителот веќе не испраќа безбедносни ажурирања, најдобрата заштита е негово заменување.