Бигорски ја прослави главната манастирска слава, тројца нови монаси во братството

Бигорскиот манастир вчера (11 септември), ја одбележа својата главна манастирска слава, празникот посветен на Отсекувањето на главата на Свети Јован Крстител. Прославата започна на 10 септември со вечерно бдение, а продолжи вчера со празнична литургија на која присуствуваа голем број верници и посетители.

Празничната литургија ја предводеше митрополитот Дебарско-кичевски г. Георгиј, во сослужение со игуменот на Бигорскиот манастир, епископот Антаниски г. Партениј, монаси и свештеници од повеќе градови.

Од Бигорски информираат дека во текот на празничната прослава манастирот бил посетен од голем број верници. Дел од нив присуствувале на бдението во текот на ноќта, а други пристигнале вчера за празничната богослужба. Годинашната прослава беше посебна за манастирското братство поради приемот на тројца нови монаси: Теодосиј, Харитон и Никифор. Со нивниот прием Бигорското братство продолжува да се зголемува.

Во своето обраќање до присутните, митрополитот Георгиј зборувал за значењето на Свети Јован Крстител и за неговото место во христијанската традиција, а посебно внимание посветил на тројцата нови монаси и на нивниот избор да му го посветат својот живот на монашкиот начин на живеење.

Годинашната прослава беше одбележана и со 30-годишнината од монашењето на отец Доситеј, а во музичкиот дел од прославата учествуваа Бигорскиот хор и хорот „Свети Јован Кукузел“ од Тирана.

фото: Бигорски манастир