Ловното друштво „Бистра“ од Гостивар подготвено за новата ловна сезона

На 20 септември започнува новата ловна сезона во ловиштето „Симница бр. 2“, со кое стопанисува Ловното друштво „Бистра“ од Гостивар. Друштвото сезоната ја пречекува со подготвен терен, изградено и одржувано ловнотехничко уредување и континуирано следење на состојбата со дивечот.

Работата во ловиштето, како што велат од „Бистра“, не е врзана само за ловните денови. Во текот на целата година се врши мониторинг на теренот и дивечот, се спроведува прихрана и се работи на создавање и одржување на услови за дивиот свет.

Дивиот свет во ловиштето регистриран преку фотозамки.

Во ловиштето има набљудувачници, ловечки чеки, трајни хранилишта, поилишта и солишта, кои се дел од системот за управување и одржување на ловиштето.

Особено охрабрувачки за ловците е што во последниот период повторно се забележуваат нови групи дива свиња со подмладок. По намалување на фондот во периодот по појавата на африканската свинска чума, одговорното стопанисување и следењето на состојбата сега носат знаци на постепено обновување.

„Она што ни е најважно е ловиштето да се одржува и со него да се стопанисува одговорно во текот на целата година. Појавата на нови групи и подмладок кај дивата свиња е добар знак и покажува дека фондот се обновува“, посочуваат од ЛД „Бистра“.

Во претстојната сезона во ловиштето ќе се лови дива свиња, како и дивечот без заштита, односно волк, лисица и чакал.

Ловните активности ќе се одвиваат во сабота, недела и на државни празници, согласно условите и правилата за лов.

Ловиштето „Симница бр. 2“ се простира на 12.400 хектари, на надморска височина од 550 до 1.674 метри. Разновидниот терен опфаќа шумски предели, ливади, пасишта и земјоделски површини, создавајќи различни услови за дивечот и ловните активности.

За Ловното друштво „Бистра“, новата сезона не е само почеток на нов ловен циклус, туку продолжение на грижата за ловиштето и дивечот што трае во текот на целата година.

„Ловецот не е само човек со пушка, тој е и чувар на природата. Нашата работа не ја мериме само според успешноста на една ловна сезона. Вистинскиот успех е она што ќе го оставиме за оние што доаѓаат после нас. На сите ловци им посакуваме безбедна и успешна сезона, со почит кон дивечот, природата и ловечката традиција“, порачува Бранко Арсески, ловник на ЛД „Бистра“.

Отворен прием за нови членови

Ловното друштво „Бистра“ информира дека приемот на нови членови трае во текот на целата година.

Годишната карта важи за целата ловна сезона 2026/27, односно до 31 март 2027 година.

Заинтересираните можат да се пријават во канцеларијата на ЛД „Бистра“, на ул. „Живко Брајкоски“, веднаш до Основниот суд во Гостивар, на втор кат, или да добијат информации на телефонскиот број 070/229-676.

Од Ловното друштво „Бистра“ ги повикуваат ловците сезоната да ја започнат одговорно, со почитување на правилата, природата и ловиштето кое со години е дел од ловечката традиција на гостиварскиот крај.

(комерцијална објава)