Определен куќен притвор за екс директорката на гостиварски Комуналец, Артана Асани

Поранешната в.д. директорка на гостиварски „Комуналец“ Артана Асани, осомничена во случајот со загадувањето на водата во Гостивар наместо во притвор ќе биде домашен притвор, потврди за Gostivarpress.mk судијата на претходна постапка во Основниот суд Гостивар, Ќирко Михајлоски.

Одлуката за определување куќен притвор е донесена по барање на бранителите на осомничената, а по добиено позитивно мислење од Основното јавно обвинителство, појасни судијата.

За другите двајца осомничени раководители во „Комуналец“, засега нема нов момент во однос на мерката притвор. Од Основниот суд Гостивар потврдија дека за нив сè уште не е донесено ново мислење во врска со мерката притвор.

Екс в.д директорка на Комуналец Гостивар Артана Асани, техничкиот директор Леон Нуредини и раководителот на одделението за водовод Вадедин Дервиши се осомничени за кривично дело од областа на тешките дела против животната средина и природата, односно за загадување на вода за пиење, за кое е предвидена затворска казна од најмалку четири години.