Освежителни пијалоци кои ќе ви помогнат полесно да ги преживеете горештините

Високите температури во пекол жешкото лето значат поголема потреба за освежување на организмот. Наместо да посегнувате по газирани сокови, со неколку едноставни и достапни состојки, можете да подготвите вкусни и освежителни домашни пијалоци.

Домашна лимонада со нане

Исцедете два лимона, додадете ладна вода, неколку листови свежо нане, малку мед или шеќер по вкус и многу мраз. Ако сакате поинтензивна арома, додадете и неколку тенки парчиња лимон во чашата.

Сок од лубеница

Лубеницата сама по себе е освежување, а како сок е уште подобра. Неколку парчиња исчистени од семки изблендирајте ги со малку ладна вода, неколку капки лимонов сок и мраз. Ќе добиете природно сладок пијалок без потреба од дополнителен шеќер.

Ладен чај со праска

Подгответе зелен или црн чај, оставете го да се излади, а потоа додајте свежи парчиња праска и неколку капки лимон. Чувајте го во фрижидер и послужете го со мраз. Освен што освежува, изгледа и одлично.

Детокс вода со краставица и лимон

Во бокал со ладна вода ставете тенки кругови краставица, лимон и неколку листови нане. По десетина минути во фрижидер, водата ќе добие свеж вкус и пријатна арома.

Овошно смути со јогурт

Во блендер ставете чаша ладен јогурт, неколку јагоди или малини, една праска и неколку коцки мраз. Ако сакате, засладете со малку мед. Овој напиток е идеален како освежување, но и како лесен појадок или ужина.