Со што нашите предци си помагале за смирување на стомачни инфекции?

Во период кога Гостивар се соочува со епидемија на гастроентеритис, а илјадници граѓани имаат симптоми како повраќање, дијареја, стомачни грчеви и мачнина, корисно е да се потсетиме дека природните препарати можат да помогнат во ублажување на симптомите, оние кои ги користеле нашите предци. Тие, сепак, не се замена за лекарски преглед или терапија, особено кај лица со висока температура, крв во столицата или знаци на дехидратација. Најважниот дел од закрепнувањето останува внесувањето доволно течности и електролити.

Свежиот ѓумбир или чај од ѓумбир е меѓу ретките природни препарати за кои постојат научни докази дека може да ја намали мачнината и повраќањето. Може да се користи како благ чај или неколку тенки парчиња да се прелијат со врела вода и да отстојат десетина минути.

За благотворните влијанија на нането знаеме сите, но помалку позната е маточината која може да помогне во смирување на грчевите во желудникот и чувството на напнатост. Особено е корисна кај лица кај кои инфекцијата е проследена со вознемиреност и несоница.

Сушените диви боровинки одамна се користат во народната медицина при пролив. Тие содржат танини кои можат да помогнат столицата постепено да се нормализира. Истото дејство го има и исушена кора од калинка, од која се прави чај. Листовите од капина се богати со танини и традиционално се употребуваат при лесни дијареи. Се подготвуваат како обичен чај и се пијат во помали количини неколку пати во текот на денот.

Не е билка, но оризот е еден од најстарите природни начини за смирување на дигестивниот систем. Водата во која се варел оризот содржи скроб кој може да помогне при дијареја и истовремено обезбедува малку енергија кога апетитот е намален.

Во многу македонски и балкански домови се варел чај од ким за смирување на стомакот, особено кај деца. Помага против грчеви и гасови, иако не лекува инфекција.

Свежото овошје понекогаш дополнително го иритира желудникот, но печеното јаболко е полесно за варење и содржи пектин, кој може да помогне во нормализирање на столицата.

Кога ќе престанат повраќањето и силната дијареја, постепено може да се воведе јогурт со живи култури или друга ферментирана храна, бидејќи одредени пробиотици можат да придонесат за побрзо закрепнување на цревната микрофлора.

Што е најважно?

Иако природните препарати можат да ги ублажат симптомите, лекарите потенцираат дека најважно е да се спречи дехидратацијата. Течностите треба да се внесуваат често, во мали голтки, а доколку има силно повраќање или пролив, најдобро е да се користат раствори за орална рехидратација кои ги надоместуваат изгубените електролити.

Ако симптомите траат повеќе од два до три дена, ако има висока температура, крв во столицата, силни болки во стомакот, знаци на дехидратација (сува уста, ретко мокрење, вртоглавица) или ако станува збор за мало дете, постаро лице или хронично болен пациент. Во такви случаи потребен е лекарски преглед.