ПИСМА: Стотина родители инсистираат на целодневна настава во ОУ „Гоце Делчев“ Гостивар

Група родители на ученици во ОУ „Гоце Делчев“ во Гостивар се обратија до нашата редакција да го споделат со јавноста своето барање за воведување на целодневна настава во училиштето, нешто што велат дека им е крајно неопходно, разочарани поради тоа што никој не одговара на нивните барања, ниту пак има најава дека нешто ќе се преземе во иднина, оставајќи ги и родителите и децата да се снаоѓаат кој како може, бараат надлежните да им излезат во пресрет.

Се работи за група од стотина родители на деца од прво, второ и трето одделение, на кои поради секојдневните работни обврски целодневната настава им е реална потреба, нагласувајќи дека во случајов најмногу страдаат децата.

Во продолжение писмото на родителите:

„Ние како родители инсистираме да се воведе целодневна настава во училиштето со што ќе се подобри квалитетот на образовниот процес и учениците ќе бидат целосно посветени на совладување на наставните содржини преку дополнителните активности по завршувањето на часовите, а со тоа ќе се постигне побрзо меѓусебно запознавање и социјализирање. Во градинката моментално има две школски групи со капацитет од 30 деца во група, а потребите се многу поголеми. Поради тоа се соочуваме со проблем. Пред точно една година поднесовме барање до Сектор за образование на Општина Гостивар и до ООУ Гоце Делчев, и усно ги запознавме со нашата потреба, но за жал после една година ние не добивме никаков одговор од двете страни. И оваа година уредно и навремено поднесовме барања, одговор уште нема. Бидејќи напредокот и благосостојбата на децата секогаш треба да бидат на прво место се надеваме дека нашите барања овој пат ќе бидат сериозно разгледани. Во име на групата родители – Слаѓана Котеска.“