Како психички и физички да се покренете во понеделник наутро?

Понеделник. Алармот ѕвони, а вие веќе чувствувате стрес од сè што ве чека? Не мора веднаш да бидете продуктивни. Еве неколку едноставни работи што можете да ги направите за полесно да го започнете денот.

Понеделник наутро често доаѓа со чувство дека неделата започнува пред ние воопшто да сме се разбудиле. Алармот, работата, домашните обврски, состаноците, пораките и задачите што нè чекаат можат да создадат стрес уште пред да станеме од кревет. А кога на тоа ќе се додаде недостигот на енергија и волја, станува тешко и самото станување.

Но, наместо веднаш да мислите на целиот ден, пробајте да си дадете само пет минути за постепено будење.

Првото нешто што можете да го направите е да внесете светлина во просторијата. Отворете ги завесите или прозорецот, а ако имате можност, излезете накратко надвор, во двор или на тераса. Утринската светлина му помага на организмот да препознае дека започнал денот и може да придонесе полесно да преминете од поспаност кон будност.

Наместо првите минути по будењето да ги поминете со телефон во рака, обидете се прво да погледнете надвор.

Ако првата мисла наутро ви е „Колку работи имам денес“, не брзајте веднаш со нив. Седнете на креветот и направете неколку бавни вдишувања и издишувања. Целта не е да го „избришете“ стресот, туку да направите кратка пауза пред да започне денот.

Изберете песна која ве расположува и пуштете ја додека се подготвувате. Музиката може да биде мал, но пријатен сигнал дека денот не е само список на обврски.

Раздвижете го телото две минути. Не ви треба тренинг, спортска опрема или половина час слободно време. Само две-три минути движење низ домот, во место, чучни-стани или истегнување.

Кога ќе почнете да размислувате за сите обврски одеднаш, тие можат да изгледаат многу поголеми отколку што навистина се. Затоа, наместо: „Како ќе постигнам сè денес?“ прашајте се: „Што е првото нешто што треба да го направам?“, па почнете го денот. Среќно!