Министерот Сулејмани во Гостивар – Какви се условите и потребите на културните установи?

Подобрување на условите за работа, инфраструктурата и опременоста на културните установи во Гостивар, како и реализација на нови проекти, најави министерот за култура и туризам Седат Сулејмани по работната посета на националните установи од областа на културата во градот.

Сулејмани ги посети Центарот за култура „АСНОМ“, Конзерваторскиот центар, Гостиварскиот театар и Галеријата, каде што разговараше со директорите и вработените за актуелната состојба, потребите на установите и можностите за нивно унапредување.

Како што соопшти Министерството за култура, на средбите биле разгледани условите за работа, кадровските потреби, инфраструктурата и опременоста, како и реализацијата на програмските активности. Разговарано било и за тековните и идните проекти кои треба да придонесат за развој на културниот живот во Гостивар и збогатување на понудата за граѓаните.

Еден од објектите на кој му е потребно сериозно подобрување е Гостиварскиот театар, за чија состојба министерот оцени дека е „очајна“.

„Гостиварскиот театар го затекнавме во очајна состојба, со руинирани простории, неред и без соодветни услови за работа на актерите и за прием на публиката. Сепак, објектот ќе биде трансформиран благодарение на ангажманот и соработката на директорите на Театарот и Центарот за култура „АСНОМ“, кои го делат истиот објект, како и благодарение на донацијата од Турската агенција за соработка и координација ТИКА. Конечно, доаѓаат подобри денови за Гостиварскиот театар“, стои во изјавата на Сулејмани.

На состаноците било разговарано и за улога на установите во развојот на културната понуда во градот, но и за можностите за поголемо поврзување на културата со туризмот.

Од Министерството посочуваат дека богатото културно наследство на Гостивар и потенцијалот на Полошкиот Регион создаваат можности за развој на културниот туризам и поголема афирмација на локалните културни вредности.

Министерството за култура и туризам најавува дека ќе продолжи со непосредна комуникација со културните установи и локалните чинители, со цел навремено да се утврдуваат потребите и да се реализираат конкретни активности и проекти за подобрување на нивното функционирање.