Објавени списоците на добитници на ваучери за инвертери

Министерството за енергетика ги објави списоците на добитници на финансиска поддршка за набавка и вградување на инвертер клима уреди, во рамки на Програмата за заштита на ранливи потрошувачи на енергија за 2026 година.

За двете опфатени категории се доделени над 500 потврди-ваучери, со кои на домаќинствата што ги исполнуваат условите им се овозможува поддршка за набавка и монтажа на инвертер клима уред, соопшти Министерството.

Поддршката е наменета за: домаќинства со едно или повеќе лица корисници на надоместок заради попреченост, согласно член 44 од Законот за социјалната заштита или домаќинства со едно или повеќе деца со попреченост, корисници на посебен додаток до 26 години.

Министерството ги повика сите добитници навремено да го реализираат стекнатото право и појасни дека постапката се одвива во неколку чекори: проверка на е-пошта, печатење на документите, избор на фирма, извршување на набавка и монтажа на инвертерот и пополнување на записникот/прашалникот.

Краен рок за искористување на потврда-ваучерите е 15 октомври 2026 година. По истекот на овој рок, ваучерите нема да можат да се користат.