ВИДЕО | Мајстор Рашит од Гостивар, прочуениот кројач со златни раце

Во неговиот дуќан „Мода Фест“ во уличката кај некогашното кино, со умешност на голем раскажувач, ни откри многу интересни детали од својот животен пат, првите чекори во занаетот, усовршувањето, познатите клиенти кои доаѓале од далеку за да ги дотера.

Мајстор Рашит речиси пет децении својата среќа ја наоѓа меѓу машините за шиење, ибришимите, кројачките ножици, метрото… Иако, официјално е пензионер, со мерак и полно срце продолжува да си работи во дуќанот, да ги услужува муштериите со насмевка и да си поприкаже за еснафот.

За тоа колку бил прочуен во својот занает зборува и фактот што во 1984 година премиерката на тогашна Југославија Милка Планинц и министерот за надворешни работи Милош Миниќ дошле кај него во Гостивар да сошијат одела за свеченото отворање на Олимпијадата во Сараево. Тоа беше „Made in Gostivar“ , се присети овој кројач со златни раце, кој за својот занает знае да каже дека е „сладок“ .

Видео сторијата може да ја проследите на нашите канали на: Rumble, YouTube и Telegram.