Македонските граѓани ќе мора да вадат ETIAS одобрение за патување во Европа, цената е 20 евра

Македонските граѓани кои ќе патуваат во земјите опфатени со новиот европски систем за патни одобренија ќе треба однапред да обезбедат ETIAS (European Travel Information and Authorisation System). Станува збор за електронско одобрение за патување, кое ќе биде задолжително за државјаните на земји со безвизен режим со ЕУ, меѓу кои е и Македонија.

Според информациите објавени од Националната асоцијација на туристички агенции, таксата за ETIAS ќе изнесува 20 евра. Од плаќање ќе бидат ослободени лицата под 18 и над 70 години, но и тие ќе треба да имаат одобрена ETIAS авторизација. Одобрението ќе важи до три години или до истекот на пасошот со кој е поднесена апликацијата, зависно од тоа што ќе настапи прво. ETIAS ќе биде електронски поврзан со пасошот и ќе овозможува повеќекратни патувања.

Сепак, со воведувањето на системот не се менува правилото за должината на престојот. За македонските граѓани и понатаму важи можноста за краткорочен престој до 90 дена во период од 180 дена.

Аплицирањето за ETIAS ќе се врши електронски, при што ќе се внесуваат лични податоци и информации од патната исправа. Поради тоа, патниците ќе треба внимателно да ги внесат податоците, особено оние од пасошот. Превозниците, меѓу кои авиокомпаниите и автобускиот превоз, ќе проверуваат дали патниците ги исполнуваат условите за патување. Тоа значи дека недостатокот на потребното одобрение може да создаде проблем уште пред патникот да се качи во превозното средство, нагласуваат од Националната асоцијација.

ETIAS не е исто што и EES. Двата европски системи често се мешаат, но имаат различна функција. ETIAS е електронско одобрение кое се обезбедува пред патувањето. EES (Entry/Exit System) е систем за дигитално евидентирање на влезот и излезот на патниците на надворешните граници на земјите кои го применуваат системот, со регистрација на податоци и биометриски информации.

Важно е и тоа што одобрениот ETIAS не значи автоматски гарантиран влез во Европа. Конечната одлука дали патникот ги исполнува условите за влез и понатаму ја носат граничните органи.

Според информациите од Националната асоцијација ETIAS е планиран да започне во последниот квартал од 2026 година (октомври–декември 2026).