Путин: Распоредување европски сили во Украина би значело војна со Русија

Рускиот претседател Владимир Путин оцени дека евентуалното распоредување европски воени сили на територијата на Украина би претставувало директно вклучување во војна со Русија.

„Во моментов европските лидери велат дека размислуваат како да испратат сили на територијата на Украина. Тоа значи војна против Русија“, изјави Путин.

Тој истовремено порача дека Москва нема намера да им се заканува на европските држави и дека Русија нема причина да влегува во директен конфликт со Европа.

„Ние не се закануваме и немаме намера да им се закануваме на европските земји. Зошто би го правеле тоа? Никој не разбира дека немаме причина да влегуваме во конфликт со Европа“, рече рускиот претседател.

Путин ги обвини европските лидери дека го плашат сопственото население со, како што ги нарече, „измислени закани“ од Русија. Според него, таква закана не постои и никогаш не постоела.

Русија, која ја започна воената инвазија врз Украина во февруари 2022 година, со години го посочува евентуалното распоредување западни војници на украинска територија како една од црвените линии на Москва.

Руските власти потсетуваат дека со години предупредувале оти проширувањето на НАТО кон руските граници го смета за сериозна безбедносна закана, но тие биле игнорирани од западните земји.