Ќе правите ли ајвар? Септемврискиот пазарен ден во Гостивар во знак на црвената пиперка

Подготовката на зимница на овие простори е традиција која се пренесува со генерации. Обично токму во овој период од септември започнува подготовката на домашните резерви за зимските месеци: најпознатиот ајвар, па лутеница, сос од домати, мармалад од сливи и други зимници од сезонското овошје и зеленчук.

Денешната слика од вторничниот пазарен ден се вклопи во традиционалната септемвриска атмосфера на подготовка на зимица. Главна на тезгите беше црвената пиперка, ајварка. Пазарот раздвижен, муштериите разгледуваа, одбираа, прашуваа за цената и потеклото на пиперката, додека продавачите се обидуваа што подобро да ја понудат својата стока и да продадат повеќе.

Продавачите рекоа дека денеска повеќе граѓани ги прашувале за потеклото на ајварката, од претпазливост по информациите дека македонска пиперка била вратена од бугарската граница поради утврдени пестициди. Станува збор за повеќе од 21 тон пиперка, во два случаи во август и септември. „Има и такви кои се плашат да купуваат“, забележаа дел од продавачите, додавајќи дека прашањата за потеклото годинава се почести.

Според нив, интерес за пиперката има, но продажбата е послаба во споредба со претходните години и се купува во помали количини.

Граѓаните сепак не се откажуваат од традицијата. Велат дека зимница ќе прават, макар и помалку од порано. Навикнати се дома да имаат тегла ајвар, лутеница или домашен мармалад, слатко и сакаат таа традиција да ја зачуваат. Сепак, и тие кажуваат дека количините ги намалуваат, некои заради цените, други заради тоа што децата им се иселиле во странство…

Што се однесува до цените, на повеќето тезги ајварката се продаваше 40 денари за килограм, а имаше и понуди од 30 денари за килограм или 3 кг за 100 денари. Цената на сливите беше 40-50 денари за килограм, на јаболката, праските и грозјето од 50 до 70 ден. Корнишоните главно беа со цени од 60 денари за килограм, иако покрупните се продаваа и поевтино, а доматите од 50 денари нагоре. Компирот и кромидот одеа по 100 денари за 3 килограми, тиквиците 3 парчиња за 50 денари, додека модриот патлиџан  2 парчиња за 50 денари. Везените пиперки кои исто така се барани за зимница држеа цена од 100-120 денари за килограм.

Сезоната на зимницата допрва започна. И во следниот период на гостиварскиот пазар се очекува да има зголемена понуда на сезонски зеленчук и овошје, а граѓаните постепено ќе ги набавуваат потребните производи за ајвар, лутеница, мармалади и останатите домашни зимски резерви. Традицијата продолжува, иако, како што велат и купувачите и продавачите, во помали количини.

На денешен ден пред 5 и 10 години...
Се сеќавате?

Пред 5 години | 15.09.2021

• 
  Дете интроверт: Бидете свесни дека сте родител на мал креативец!Од рана возраст, родителите можат да препознаат дали нивното дете е „лидер“,…
• 
  Нови 617 корона позитивни и 32 смртни случаи во последно деноноќие во МакедонијаВо последните 24 часа се направени 4.621 тестирање, а регистрирани се 617…
• 
  Починатото лице на 23 години од Гостивар немало хронични болести и не било вакцинирано против ковидМинатата недела во извештајот на Министерството за здравство како починати беа евидентирани…

Пред 10 години | 15.09.2016

• 
  Проверете дали сте на листата - УЈП ќе врши присилна наплата за радиодифузна таксаУЈП ја објави септемвриската листа на должници за радиодифузна такса Проверете дали…
• 
  Гостивар во два претреси пронајдени 2.5кг марихуанаГостиварската полиција во повторен претрес  во домот на В.М. (44) откри и…

Архива 10 години • Gostivarpress.mk