Второто полугодие во Гостивар ќе стартува со нови директори по училиштата

Низ основните и средни училишта на подрачјето на општина Гостивар, периодов има промени на раководните позиции. Тие доаѓаат по враќањето на надлежностите од образованието во рацете на општинската власт.

Во основното училиште „Единство“ за в.д директор е поставен Зијадин Нуредини, на местото на Мерсел Садику, додека во средното техничко училиште в.д директор е Садудин Садики, кој го замени Ибраим Асани. Разрешени се и директорите на ОУ „Гоце Делчев“, Игор Радески и средното економско училиште, Тони Ефремовски. Во овие училишта на раководните места се вратени претходните кадри, Сашо Шарески и Јованка Огњаноска. Во гимназијата на местото на Џези Камбери, поставен е Мирсад Исеини.

Промени на директорските места има и во останатите образовни установи во градот и по селата, па така Гостивар ќе го дочека второто полугодие, кое стартува од понеделник со нови директори по школите.