Стефановски: Гостивар одличен како домаќин и публика, благодариме од срце!

Големата сала на Центарот за култура „АСНОМ“ во Гостивар вчеравечер беше исполнета до последното столче на концертот на Влатко Стефановски Трио, кој установата го организираше по повод Денот на независноста на Македонија, 8 Септември. Во публиката, гостиварци од сите генерации уживаа во деведесетминутното музичко шоу на гитарскиот виртуоз Влатко Стефановски, придружуван од младите мегаталенти Иван Кукиќ на бас гитара и Јан Стефановски на тапани.

„Во оваа сала не сум бил 15 години, концерт од ваков тип во Гостивар не сум имал цели 15 години. За оваа вечер има уште еден куриозитет, а тоа е што ова е прв концерт во Македонија на ова трио, летово. А, бевме на пат, на настапи дури 46 дена низ Словенија, Хрватска, Црна Гора, Босна и Херцеговина, Србија, насекаде свиревме, а еве во Гостивар е првиот концерт во Македонија летово. Наидовме на многу убаво гостопримство во Гостивар од домаќините и драго ми е што настапуваме пред ваква одлична публика, навистина не‘ очекувавме толку, благодариме од срце. Особено сум горд на ова трио, многу сум задоволен од досегашната работа, затоа што таква ритам секција многу тешко се наоѓа, не само во регионот, верувам и пошироко, многу е тешко да се најде ритам секција која дише заедно, свири како едно, звучи добро, која има фокус и концентрација за време на целиот концерт, навистина сум среќен и задоволен“, рече во изјава за Gostivarpress.mk, Влатко Стефановски.

Триото изведе бројни препознатливи нумери со етно нишка, рок и поп хитови од времето на Леб и Сол, а се свиреше и џез и блуз музика. Концертот се затвори со безвременската „Бистра вода“ со која музичарите испратија и честитка за празникот. Публиката ненаситна за квалитетно музичко доживување, со огромен аплауз ги врати на бис.

Во знак на почит и признание за 50 години музичко творештво и кариера, гостиварскиот Центар за култура на Стефановски му додели Плакета.

Концертот се организираше со поддршка на Министерството за култура.