Акција за уредување околу спомен-плочата на загинатите градители на ХЕС Маврово во Торбешки мост

Здружението „Акцијаш“ од Гостивар вчера по повод Денот на Акцијашите – 1 Април организираше акција за уредување на локацијата на спомен-плочата подигната во месноста Торбешки мост во чест на загинатите градители на Хидросистемот Маврово. Во активноста, покрај припадниците на здружението, учествуваше и синдикалната подружница на ХЕС „Маврово“ – Гостивар.

„Програмата на активности на Здружението „Акцијаш“ од Гостивар секоја година традиционално е поддржана од АД ЕСМ, подружница ХЕС „Маврово“, во знак на благодарност на некогашните младински работнички бригади, кои со нивното волонтерско учевство во работни акции изградиле многу капитални објекти ширум државата.“, соопштија од ЕСМ.

Мавровскиот хидросистем е еден од најголемите и најзначајните објекти изградени од овие младиниски работнички бригади. Првата фаза од неговата изградбата почнала во 1947 година, а завршила по 13 години, во 1960 година. Во 1952 година започнало да се полни Мавровското Езеро кое претставува најголемото вештачко езеро во Македонија. Водите што се влеваат во езерото се собираат од површина од над 500 km2 од планининските масиви на Кораб и Шар Планина. Водата се пренесува со канали и цевководи долги над 130 километри.

Во февруари годинава беа одбележани 68 години од мавровската снежна трагедија, кога големи снежни лавини однесоа 52 човечки животи. Трагедијата се случила ноќта на меѓу 10 и 11 февруари 1956 година, по долината на Радика (Торбешки мост и Стрезимир) кога снежни лавини од планината Кораб се урнале врз куќи, караули и бараките на градителите. Како последица на лавините биле затрупани стотина луѓе. Спасувачките екипи успеале да извлечат само половина од нив.

Во нивна чест подоцна се подигнати спомен плочата лоцирана во месноста Торбешки мост, како и меморијалниот споменик во близина на Маврови анови каде што секоја година симболично се оддава почит во спомен на загинатите градители.

фото:ЕСМ