Шетајте во природа со четири очи отворени

Топлото време ги мами граѓаните слободните денови од викендот да ги искористат за престој и прошетки во природа. Сепак и покрај опуштањето и уживањето, по напорната работна недела, не треба да се заборави на опасностите со кои може да се соочите на отворено, особено овој период, како што се на пример разните инсекти (оси, стршлени и сл.) и крлежите. Неопходна е внимателност, а се препорачуваат превентивни мерки:

-да се носи облека што не остава откриени делови од телото

-краевите на панталоните да се вовлечат во чорапите, а блузите со долги ракави да бидат закопчани до крај

-по можност да се користи специјален спреј против крлежи и инсекти

-да не се нанесуваат парфеми

-да се направи детален преглед на телото по враќање дома

Реакцијата на убоди од крлежи и инсекти е индивидуална. Може да се предизвикаат полесни кожени алергии, црвенила, но и животно-загрозувачки алергиски реакции со гушење. Доколку после убод се забележи дека состојбата се влошува, тогаш задолжително треба да се јавите на лекар. Ако е локална реакција тогаш може да си помогнете со ставање ладна облога и локални антихистаминици.

На лекар треба да се јават и лицата кои по една до две недели откако биле каснати од комарци или крлеж, добиле висока температура, треска и осип по телото, за да се провери дали станува збор за некоја болст пренесена од инсектите.