12,8% од заразените со корона биле целосно вакцинирани, меѓу 25-те починати нема вакцинирани – анализа на МЗ

Министерството за здравство соопшти дека започнува со редовна анализа на неделно ниво, која секој петок ќе ја објавува во јавноста, а се однесува на процентот на вакцинирани меѓу позитивните случаи и починатите од КОВИД-19 во државата. Во оваа анализа за вакцинирани се сметаат лицата кои се вакцинирани со две дози и поминале најмалку 14 дена од примање на втора доза вакцина, извести МЗ.

Во извештајот за периодот од 6 до 12 август се наведува дека на територијата на државата потврдени се 3.497 позитивни на ковид, од кои 450 биле целосно вакцинирани, односно 12,8%. Останатите 87,1% или 3.047 граѓани од позитивните на Ковид 19 не биле вакцинирани.

„Смртноста кај невакцинираните е 100%, покажува анализата. Во период од една седмица на територија на државата починале 25 лица со КОВИД-19, ниту еден од нив не бил вакциниран. Министерството за здравство укажува на важноста на вакцинација, секоја вакцина која ја имаме на располагање е безбедна, ја намалува шансата од заболување, спречува тешка форма на болеста и штити од смртен исход. Министерството за здравство апелира граѓаните да се вакцинираат, само така ќе дојдеме до колективен имунитет и ќе спречиме ширење на мутации на СарсКов2.“, соопшти МЗ.