Алијанса за Албанците: ДУИ и СДСМ се тие кои прават опструкции и прекршуваат правила

Советничката група на Алијанса за Албанците во Советот на општина Гостивар денес на прес даде коментар за текот на вчерашната седница и донесените одлуки за отфрлање на решенијата за оспорување на изборот на претседател. Координаторот на групата, Њомза Шаќири нагласи дека бил прекршен правилникот за работа на Советот, дека членовите од мнозинството вршеле опструкции и не прифатиле предлог кој е важен за вработените во училиштата.

„Како координатор на групата на советници од Алијанса, БЕСА, ВМРО ДПМНЕ и ДНЕТ, сакам да ја информирам јавноста за тоа што се случуваше. Иако 31 советник гласаа против записникот од претходната седница, седницата продолжи и на тој начин се прекрши правилото за одвивање на една седница на советот на општината. Ние бевме обвинети дека правиме опструкции , но очигледно беше дека групата на советници од ДУИ и СДСМ се тие кои прават опструкции. Како пример ќе го посочам фактот што не го изгласаа предлогот за прераспределба на средства во буџетот наменети за вработените во образованието. Исто така, прашуваме зошто се повикува полиција секогаш кога има седница на советот.“, рече Шаќири.

На вчерашната седница на Советот, мнозинството го потврди изборот на Насир Муслиу од ДУИ за претседател со отфрлање на решението за оспорување од страна на градоначалникот. Во меѓувреме покрената е постапка пред Инспекторатот за локална самоуправа за законитоста на процедурата за изборот.