Синдикат на градежници: Работниците да не работат на отворено на топлото време

Синдикатот за градежништво, индустрија и проектирање достави барање до Министерството за здравство, Државниот инспекторат за труд и Организацијата на работодавачи, за превентивни мерки при високи температури.

Во барањето на Синдикатот се вели:

• Да не се изложуваат работниците на работа на отворено (под директно зрачење на сонце) во периодот од 11 часот до 17 часот;

• Да се обезбедат течности и одговорните лица да обезбедат поголеми количини на вода;

• Повозрасните лица, бремените жени и хронично болните лица да бидат ослободени од работни обврски;

. Проверка на техничко – технолошки колективни мерки за заштита (адекватна вентилација и по можност климатизација).

„Согласно Акциониот план за превенирање на последиците од топлотните бранови врз населението и мерките за Безбедност и здравје при работа, укажуваме дека работодавачите од целата држава треба да ги почитуваат општите препораки за заштита на работниците од високите температури како што се: заштита од директна сончева изложеност, избегнување престој на отворено во период од 11-17 часот, консумирање повеќе течности и хигиенски начин на подготовка на храната. СГИП препорачува и бара да горенаведените препораки останат валидни се додека траат високите температури или државните надлежните органи не донесат официјални упатства.“, наведува синдикатот.