Гостиварка го пријавила сопругот за насилство

Во Гостивар е регистриран нов случај на семејно насилство. Секторот за внатрешни работи соопшти дека триесет и петгодишна гостиварка, ноќеска околу 1 часот и 10 минути по полноќ, пријавила семејно насилство од нејзиниот 40-годишен сопруг И.М.

Пријавениот набрзо бил лишен од слобода и задржан во Полициската станица Гостивар за расчистување на случајот.

Од почетокот на годината на гостиварското подрачје имало триесетина случаи на семејно насилство. Најчести жртви се жените. Стручните лица сметаат дека жените за разлика од порано, сега се охрабруваат да ги пријавуваат насилниците и да бараат помош од институциите.

„Правната заштита е поголема, законот се применува, институциите и службите како што се судот, полицијата се посвесни за феноменот и се поактивни. Поради тоа и жртвите се охрабрени да пријавуваат. Сепак, во голема мера ние сме народ што нема превенција и тука лежи најголемиот проблем.“, велат психолозите.

Минатата година на подрачјето на Гостивар регистрирани се 24 кривични дела поврзани со семејно насилство. На жртвите им биле нанесени телесни повреди, кои во некои случаи биле и од потешка природа.