Стопирани извршителите, не смеат да наплаќаат долгови

Владата на вчерашната седница донесе уредба со законска сила за запирање на примената на Законот за извршување, до 30 јуни 2020 година.

„Според оваа Уредба, извршителите се должни да запрат со преземање на било какви извршни дејствија, освен: во предметите за побарувања врз основа на законска издршка, со распределба на средствата пристигнати на нивните посебни сметки, доколку за тоа се исполнети законските услови и со дејствијата кои следат по наплатата на средства од должникот, успешно спроведени јавни надавања, или продажби со непосредна спогодба.“, соопштија од владината прес служба.

Уредбата утврдува дека работодавците на должниците, Фондот за пензиско и инвалидско осигурување и носителите  на платен промет се должни да запрат со постапување по издадените налози од страна на извршителите до 30 јуни 2020 година.

Основните судови се должни да донесат одлуки по поднесените приговори за незаконитости при извршувањето, а Апелационите судови по поднесените жалби против решението на судот по приговор, со цел да се создадат услови за непречена распределба на средствата пристигнати на посебните сметки на извршителите.