Неделно ковид инфо: Речиси 50% помалку нови случаи, смртноста намалена за 38%

Во неделниот извештај за ковид во Македонија на Институтот за јавно здравје за периодот од 10 до 16 мај, се бележи намалување на новите случаи и смртноста.

Тестирани се вкупно 16.773 материјали, а регистрирани сe 674 нови позитивни случаи од 31 град во државата со намалување од 48,3% во однос на претходната недела. Процентот на позитивност се движи од 1,8% до 7,2%, просечно 4,0%. Најголем дел од регистрираните случаи се од Скопје (280). Во регионот на Гостивар потврдени се 16 случаи.

Меѓу новозаболените најзастапена е возрасната група на лица на возраст над 60 години (240). Најмал број е регистриран кај децата од 0-9 (6 случаи) и 10-19 години (33 случаи).

По добиени 2 негативни теста за присуство на SARS-CoV-2 или со употреба на новиот алгоритам, со статус „оздравени“ се стекнале 2.646 лица кои биле хоспитализирани или на домашно лекување, со намалување од 36% во споредба со минатата недела.

Пријавени се 65 смртни случаи од 15 градови, 38,1% помалку во однос на минатата недела. Во однос на возраста, 56 лица биле над 60 години, 7 лица на возраст од 50-59 години, 1 лице на возраст од 40-49 години и 1 лице на возраст од 30-39 години.