Галичка свадба од 16 до 18 јули, младенци се Филип Бундовски и Катерина Илиевска

Годинешното издание на Галичката свадба ќе се одржи од 16 до 18 јули, соопштија од Месната заедница Галичник. Лани, поради ковид пандемијата манифестацијата беше откажана, но годинава традицијата во живописниот Галичник продолжува.

„Планирано е Галичката свадба да се одржи од 16 до 18 јули, согласно протоколите за заштита и спречување на ширењето на Ковид 19 кои ќе се применуваат за организација на настани на отворено, и каде ќе дадеме и наш придонес.“, наведе Месната заедница.

По сите старински обичаи и традиции љубовта ќе ја крунисаат Филип Бундовски и Катерина Илиевска, кои лани беа избрани за зет и невеста на Галичка свадба.

Настанот ќе се организира под покровителство на претседателот Стево Пендаровски.

Свадбарските обичаи почнуваат со пукање три пушки од балконот на куќата на зетот, веење на свадбарскиот бајрак, продолжуваат со играње на свекрвино и невестинско оро, опфаќаат традиции како канење на починатите, канење на кумот, бричење на зетот, гледање низ прстен, земање на невестата и други.

фото:МЗ Галичник