Во Бигорски почнува Богојавленското празнување, крстот на Водици ќе се положи во Радика

Со вечерна богослужба и сеноќно бдение вечерва во Бигорскиот манастир започнува чествувањето на големиот христијански празник Богојавление-Водици. Во среда на ден Водици, во 8 часот наутро ќе биде отслужена Божествена златоустова литургија во храмот Пресвета Богородица во Ростуше, по што во 9.30 часот ќе тргне литијата до Ростушки мост и светиот крст ќе биде положен во реката Радика.

„Божјата благодат и силата на Светиот Дух со кој се осветува водата, особено се чувствува на денот на Просвештението, кога правиме спомен на Крштението Господово од раката на Св. Јован Претеча. Со чинот на осветувањето на богојавленската вода и полагањето на крстот во водите, се символизира ослободувањето од гревот што Христос му го донесе на родот човечки. Во тој миг се случува осветување на сите води и секој што ќе се допре или пие од таа осветена и облагодатена вода, го чувствува Божјиот благослов, се исполнува со голема сила и му се дава духовно и телесно здравје, но само доколку со вистински страв Божји и побожност пристапува кон оваа голема тајна. Затоа е многу важно учесниците во чинот на полагањето на крстот во водата претходно да учествуваат и на Божествената Литургија со примање на Светата причест.“, се вели во соопштението од Бигорски.

фото:Бигорски манастир