Угостителските објекти во Гостивар летово со 2 часа плус работно време

Со одлука на Советот на Општина Гостивар се продолжи работното време на угостителските објекти во јули и август. Угостителите добиваат 2 часа плус за работа. Предлогот дојде од претседателот на Советот, Валбон Лимани.

„По две години пандемија и ограничувања сите угостители го чекаат летниот период кога доаѓаат и печалбарите, па сметам дека е добро да им излеземе во пресрет со продолжено работно време. Ова е согласно Законот за локална самоуправа, а продолженото работно време ќе важи од 2 до 31 јули, освен во деновите 3,5,18,21 и 28 јули и од 1 до 20 август освен во деновите 4,8,11 и 16 август“, рече Лимани.

Во одлуката, исто така беше вметнат и предлог за можност на лето, дуќанџиите сами да може да одлучуваат дали ќе работат во недела.

Одлуката беше донесена едногласно.