Граѓани се жалат на незаконска наплата за радиодифузна такса

Голем број граѓани неосновано се евидентирани како обврзници за плаќање на радиодифузна такса, а  постапките за одлучување по нивните барања за ослободување од плаќање неоправдано се одолжуваат. Ова е заклучок нотиран во извештајот на Народниот правобранител на Македонија за 2016-та година. Одговорноста за случаите си ја префрлаат Македонската радио телевизија и Управата за Јавни Приходи, при што граѓаните трпат штетни последици.

Минатата година околу 1.000 граѓани поднеле преставки до Народниот правобранител за неоснована наплата на радиодифузна такса. Се жалеле дека им стигнуваат сметки, иако некои од нив со години биле иселени од земјата или спаѓаат во категорија граѓани кои се законски ослободени од плаќање на таксата, како слепи или глуви лица.

Омбудсманот како основна причина за прекршување на правата на граѓаните во оваа насока го посочува лошиот пристап за формирање на Регистарот на обврзници и неговото несоодветно ажурирање.