Музикотерапевтот Адеми од Гостивар преку звуци, песна и игра помага во развојот на децата со посебни потреби

Професорот по музичко образованние во Основното музичко училиште „Енвер Стафаи“ во Гостивар Илир Адеми последниве години е посветен на имплементирање на музикотерапија, која многу позитивно делува врз развојот на децата со посебни потреби. До сега има спроведено повеќе работилници со музикотерапија, наменети за дечињата со аутизам, Даунов синдром, церебрална парализа. Во тие сеанси децата развиваат комуникација преку звуци, песна, игра.

„Јас самиот како татко на девојче со посебни потреби увидов дека е важно да ја совладам оваа техника и метода, затоа што навистина музиката многу позитивно делува врз развојот на децата со посебни потреби, ги релаксира и ги смирува. Кај нас се‘ уште не е доволно развиена, но и малите чекори се значајни. Музикотерапијата во светот особено почнала да се развива после Втората светска војна, кога се користела во лекување на воените ветерани. Се увидело дека музиката навистина може да лечи, па се формирале и разни музикотерапевтски здруженија, а денес низ Универзитетите во Западна Европа веќе има и посебни програми кои ја изучуваат оваа метода“, вели Адеми.

Кога станува збор за спроведување ваков вид на техника, најчесто се работи во групи, но се прават и индивидуални сеанси. „Се‘ зависи од проценката и начинот на работа што го имплементира музикотерапевтот. Некои деца лесно прифаќаат и се вклопуваат во групи, сакаат социјализација, но има и такви на кои социјализацијата им е тешка, па со нив е најдобро да се работи индивидуално“, појаснува Адеми.

Работилниицте периодов се во мирување заради пандемијата, но кога ќе се создадат услови ќе започнат повторно да се организираат.

Професорот нагласува дека музикотерапијата не е само за деца со посебни потреби, туку може да помага и кај деца со потешкотии во учењето, кај хиперактивни деца и сл.

Научни истражувања го потврдуваат благотворното дејство на музичките инструменти врз конкретни човекови органи. Така на пример, харфата најмногу се користи во лекување на пциенти кои боледуваат од бронхитис и брохијална астма. Звиуцте на гитарата најчесто се препорачуваат во лекувањето на срцеви заболувања, додека пијаното за здрав желудник.