Немаат дозвола, ама си возат-На гостиварско подрачје годинава откриени 115 такви лица

Во изминативе нешто повеќе од два и пол месеци од годинава, заклучно со денеска (20 март) на поширокото гостиварско подрачје вкупно се откриени и санкционирани 115 лица без возачки дозволи, од кои 8 биле малолетници.

На сите им биле изготвени предвидените поднесоци со парична глоба од 250 евра во денарска, а со толкава глоба ќе се соочат и сопствениците на возилата кои им ги дале да ги управуваат, иако знаеле дека не го положиле теоретскиот и практичниот дел од возачкиот испит, нагласуваат од СВР Тетово.

Во истиот период на тетовското подрачје биле санкционирани 300 лица кои ги управувале возилата без претходно положен возачки испит и валидна дозвола.

Секторот за внатрешни работи Тетово со апел до возачите да не седнуваат зад управувачот беа возачки дозволи, не само кога станува збор за патнички или товарни возила, туку и мотоцикли кои во наредниот период ќе бидат се побројни на тетовските и гостиварските улици. Полицијата најавува дека ќе се засилат планираните контроли и ќе се санкционираат сите оние кои без положен испит учествуваат во сообраќајот.