Новогодишна забава за дечињата во Гостивар, подарени над 600 пакетчиња

Градскиот плоштад во Гостивар денес беше место на детска радост, возбуда, игри и песна и новогодишни дарувања.

Дечињата најмногу му се радуваат на Дедо Мраз и тој ги почести со своето присуство на забавата, и им подари новогодишни пакетчиња. На големо задоволство, најмалите гостиварци имаа можност и да се дружат и фотографираат со омилените ликови од цртани филмови и приказни. Настанот го организираше Хуманитарното здружение „Др. Трајче Нешковски“ под мотото „Насмевка за секое дете“.

„Денешната предновогодишна детска забава се организира со цел да се доближи празничната атмосфера во градот и да се развие предновогодишната радост кај секое дете. Драго ми е што настанот поминува во позитивна атмосфера, има многу среќни дечиња, радосни и расположени. Нема поголема среќа од детската среќа и нема поголема радост од детската насмевка“, нагласи Ема Нешковска од здружението организатор.

Во текот на забавата, на која дојдоа и организирани групи деца од градинките и училиштата, Дедо Мраз подели повеќе од 600 пакетчиња.

Од Хуманитарното здружение на граѓани „Др. Трајче Нешковски“ од Гостивар рекоа дека и понатаму ќе продолжат со активности насочени кон поддршка на најмалите, на ранливите категории граѓани, промоција на позитивни вредности и слично.

Повеќе фото на нашиот Телеграм канал.