Околу 480 илјади евра за реконструкција на болницата во Гостивар

Општата болница „Д-р.Ферид Мурад“ во Гостивар ќе има нов надворешен изглед и пониски трошоци за затоплување. Ова ќе се постигне преку проект кој опфаќа реконструкција на фасадата, замена на старите прозорци со нови, како и реновирање на дел од покривната конструкција.

Финансиските средства во висина од 480 илјади евра за оваа намена болницата ги доби преку пакетот за поддршка на инфраструктурни проекти од програмата ТАВ.

„Во саботата потпишавме договор за финасирање на проектот, кој инаку како управа го имавме подготвено одамна како проект за енергетска ефикасност, имајќи ги предвид и потребите на болницата. Се случи компанијата ТАВ да понуди поддршка на такви проекти, ние конкуриравме и ни ги одобрија средствата. Договорот беше потпишан од трите страни: болницата, владата и претставниците на ТАВ. Проектот опфаќа промена на сите прозорци, реконструкција на фасадата и дел од покривот. На овој начин се добива двоен ефект, освен подобрување на изгледот на болницата, и заштеда на топлинска енергија, намалување на трошоците за мазутот. Во целина ова е еден идеален проект за нашата болница“, појасни директорот на болницата д-р Јакуп Јакупи.

Во следниот период ќе се спроведуваат административните процедури, избор на фирма изведувач и други подготвителни активности по што ќе се стартува со работите. Првичните проценки и најави се дека тоа ќе се случи до крајот на годинава.

По стивнувањето на состојбата со коронавирус во Гостивар, општата болница се врати во нормален тек на работа. Претходно темелно беа исчистени и дезинфицирани одделенијата кои во екот на пандемијата беа пренаменети во ковид центри.