Пазар Гостивар – Ќе правиме ајвар, но помалку оти е скапо, велат граѓаните

Овој период од годината семејствата традиционално го посветуваат на подготовка на разни зимници, неизбежниот ајвар, но и по некоја тегла лутеница, малиџано, слатко, мармалад, како и сос и кечап. На градскиот пазар во Гостивар овој вторничен пазарен ден беше раздвижено, а тезгите изобилуваат со зеленчук и овошје.

„Луѓе има, но многу слабо купуваат за разлика од претходно, земаат помали количини, или само ќе разгледаат, ќе прашаат за цена и заминуват“, коментираат пазарџиите.

Повеќето гостиварци кои беа дојдени на пазар рекоа дека не сакаат да се откажат од традицијата на подготвување зимници, но велат ќе прават помалку заради цените, кои според нив се прескапи за семејниот буџет.

Цените на црвените пиперки „ајварки“ се движат од 30 до 40 денари за килограм, модриот патлиџан по 20 до 30 денари за парче, доматите се продаваат почнувајќи од 50 денари кг. нагоре, модрите сливи од 25 до 40 денари килограм…