Почна изградбата на нов водовод во гостиварско Дебреше

Жителите на гостиварското село Дебреше од наесен нема да имаат недостиг на вода. Во ова село, започна изградбата на нова водоводна линија во должина од 2.300 метри, со која двојно ќе се зголеми количината на водата за пиење за населението.

“Дебрешани многу често се жалеа на недостиг на вода за пиење. Сметаме дека со изградба на оваа нова линија, односно со добивање на вода од два дополнителни извори, проблемите ќе се надминат.“, рече градоначалникот Арбен Таравари, кој заедно со директорот на ЈП Комуналец Исак Лазами беа во селото за да го проследат почетокот на работите.

Лазами информираше дека договорот со Секретаријатот за економски прашања на Швајцарија (SECO), кој беше потпишан деновиве вклучува подобрување на водоснабдувањето на Дебреше со вода и дека проектите ќе бидат квалитетно спроведени по сите стандарди. Според најавите, новата водоводна линија ќе биде завршена за околу два месеци.

Во ова село деновиве, населението со поддршка на општината и јавните претпријатија спроведе акции за чистење и уредување на јавни површини.